usahay katingad-an ka, ikaw nga sukwahi

usahay katingad-an ka ikaw nga sukwahi sa kinabuhing putli

kay sa dihang gitook na sa itom nga pak-an ang puti nga pak-an,
sa dihang misulirat ang mga mata sa usa ka anghel nga gipiit niya sa mga dingding sa kawanangan

naunsa bang hitaboa nga ikaw hinoon mipakpak man
sa nag-ung-ong nga kaparotan sa usa ka putli nga pak-an?

sa tinood lang hapit baya usab ako mipakpak
apan akong gigapos nako ang akong mga kamot
sa kilid sa akong bakos kay sa akong kasingkasing
anaa pa gihapon ang kahadlok nga ang nanan-aw
kanako mangapalaw

talawan ako nga migawas sa bilahan sa akong inahan
talawan gihapon akong mosulod sa laing bilahan

nasina ako kanimo
ikaw nga ang mga kamot gikubalan sa kahigal

unyang gabii kanang kitang duha na lang
mag-inom ta og tanduay nga dunay mga gamot sa ginseng

suginli ko sa mga panghitabo
didto sa kagulangan sa mga lob-lob
sa mga kabulakan sa mga litni
sa mga tin-aw og mabugnaw nga mga sapa
diin nangaligo og nanag-unot ang mga pulahon
og kandiisonnga mga talib og
mga gahi, taas, baga og mga sinaw nga mga neto.