mY secreT ponD

kon manghatag ka
hatag na lang
ayaw na pangutana
sa ilang ngalan
dis-a sila gikan
og nganong
anaa sila dinhi
sa atong lugar
sa kapiskay og kaharohay

kinsa bay angay basolon
sa mga panghitabo?
kinsa bay angay pangutan-on
sa ilang gidangatan?
gusto pa ba nimong tan-awon
ang mga panid sa kagahapon
aron masayod ka
sa tinoog nga hinungdan?

kon mohatag ka
hatag na lang
ayaw na og daghan
og bagotbot
og estorya

ang gamay nimong amot
ila kanang dawaton

og palihog tan-awa pag-ayo
sa dihang ilang gidawat
ang imong limos
samtang nagsakay ka diha
sa imong mahalon nga sakyanan

gibuliskad nila ang palad
sa kapobrehon
wala nila gikaulaw ang ilang pagpalimos
kay gakutoy na kaayo
ang ilang mga tiyan sa kabutom
nauga na ang ilang mga
dila sa kauhaw
sa tungatunga sa kainit
sa adlaw

kon gusto ka gayod nga masayod
og aron mopatigbabaw diha
sa imong dughan ang tinood
nga kalooy og ang paghatag
nga kuyog ang gugma
og dili ang kasuko

tun-i ang pagbasa ang mga linya
sa ilang palad
naa diha ang mga tubag.

palad,
og kay naukit
man kana sa ilang mga palad
walay mahimo ang tawo
sa nahisulat nang daan didto
napatik didto ang ilang kapobrehon
bisan og giunsa nila pagpaningkamot

nga magtagbo
ang adlaw og bulan
diha sa tunga ilang mga agtang.

halin lang sa pulak
sa imong mga lubi
ang imong ihatag
unsa bay imong gikasuk-an?

dili sila sagbot sa katilingban
wala silay mga dahon
og mga sanga
apan sa imong pagkapunto-ensakto

tan-awa nabukog
ka na hinoon sa imong
tutunlan