motindog ka nga usa lang
sa atubangan sa salamin
tutukan mo ang imong mga mata
mora kag misalom sa lawom kaayo nga suba
molangoy mangita sa mga katarungan
ngano nga dili mo suod nga higala
ang imong kaugalingon
mao kini ang imong panaw
dili kini sayon
ang panaw sulod sa suba sa imong kaugalingon
anaa ang bangka
nga walay bugsay nga walay katig
ikaw lang ang pasahero og ikaw lang usab
ang bosero
anaa ang ngitngit kaayo nga langit
ang mingaw kaayo nga kawanangan
sa tubig nga walay kisaw
og samtang ikaw naglawig
mabati mo ang lalom nga kahilom sa tubig
kon asa ka paingon wala ka masayod
og asa ka modunggo og kanus-a mahuman ang panaw
wala kay hanaw
motan-aw kas taas
tinood anaa kay makita nga gamayng kahayag
mabati mo sa dughan
nga ikaw usa sa gamay kaayo nga bitoon
bation mo ang pagsidlak
sulod sa imong dili pa masabtan
nga kahanap og kangitngit
No comments:
Post a Comment