unta

mas maayo unta ang pagkagasto sa mga bililhong oras
kon wala kita nagpunay og ergo
kon wala nato kini giwaldas anang mga lalis
anang mga ginagmay nga dili na unta angayan
nga hisgotan og atong giawayan

anang imong mga panghinguto anang imong pagpangita og mga lusa
sa akong buhok nga imong giirok sa akong atubangan

makabasol usahay ang mga panghitabo
ang pagpanglabay nga walay pulos sa mga oras

unta nanayaw na lang kitang duha sa musika
sa usa ka gugma
kaysa nagtinodluay kitang duha kon kinsay
sinugdanan anang mga kasilag

kon nganong nagpunay kitag sugnod
sa usa ka sunog nga kitang duha ang
gihimong sinugba

nga kita ra pong duha ang nangapagod.