nagbilin kag panultion
nga og gusto nakong usbon ang lakat sa akong kinabuhi
kanang dili magsaraysaray ang akong tiil og magbitay ang akong mga kamot
nga walay hawiran,
usbon sab kuno nako ang akong panultihon, nga ang akong baba ako lang abrihon
kon dunay maayong isulti,
abi nimo gikapoy na baya ako unsaon paglakaw
og naglibog na pod ako og unsay akong isulti sa bulan karong gabii
og unsa na poy akong ipasalig sa mga bitoon
wala na ko kasabot
kay ang mga gamhanan nga nagtukod og dagkong mga balay
nangamatay man nga ang ilang mga mata nagsulirat sa kisame sa mga
mahalon nga hospital
og ang mga pobre usab nagpasad man nga nangamatay didto sa bukid
nga wala man gani malubong
kinsa ba ang angay nga awaton?
kinsang nilakwan ang akong suhiron?
unsa ang akong buhaton nga ako gayong buhaton?
og unsa ang dili nako buhaton nga dili gayod nako buhaton?
kay naay mga butang nga dili unta angayan buhaton
apan ato mang gibuhat
og daghang gibuhat nako nga abi natog dili nato mabuhat
daghang usab ang wala nato matagad
bisan lang gani paghunahuna kon kini apil ba sa mga buluhaton
wala nay sulod ang akong kasingkasing
bisan hangin, wala na gani kahadlok
ang ilang mga gibantog nga gamhanan
kadtong akong
gipakisama nga mga halangdon
morag mga iro nga nagtagad
sa ilang bahin nga mumho sa kan-on
sa silong sa akong lamesa,
mga sudlanan sa upos sa mga sigarilyo
nga wala pa matayhop
mga kabo nga giagup-op apan
gipasagdan na lang sa kilid sa banyo.
No comments:
Post a Comment