pag-ampo

sa kaadlawon sa imong mga pag-ampo
naalimpongatan nako
ang imong giyamyam
dunay portion didto
sa imong gibasa sa imong
nobenahan nga
"...ams an deds"

og ako mitindog
og mitan-aw kanimo nga galuhod
atubang sa altar
diin ang tanan nimong mga santos
nanagtapok

naa didto si Jose og si Maria
og ang ilang bugtong
anak nga si Hesus

sa kilid naa si Sta. Felomina
og si San Tiago, naay mga anghel
na si Serapim og Cherubim
nga morag mga vines sa kilid
sa bongbong sa imong altar
sa sulod sa atong kwarto

naa pod diay San Hudas
og San Martin de Porres
og Santa Immaculada ang
Imong Patrona og ang
Santo Domingo og Santa Lucia
og Santissima Trinidad


mikuhit ko nimo
og ako kang gipangutana
unsa nang "ams an deds"?

mipaturatoy ka sa ikapito nga adlaw
dili padistorbo
mibalibad ka nga akong pahunongon
sa imong mga pangamuyo

(nga unta tagaan na ta karong tuiga
pagkahuman sa pista sa senyor san vicente de ferrer
og usa ka anak)

og sa dihang nahuman ka na
og dayog haploy sa imong tuhod
nangutana na pod ako og unsa kanang
"ams an deds"

og mora kag gisapot
sa akong pag-kaerehe og pagkabugal-bugalon
kabahin anang mga pag-ampo

og mitindog ka paingon sa kusina
og dayog lamba sa pultahan
og mibilin og hunat og estorya

"ambot nimong tawhana ka!"

hangtod karon nalibog pa gihapon ako
og unsay sala nako nimong

"...bayhana ka!"

wala pa gihapon nako masulbad kon
unsa nang "..ams an deds".