sa dihang nabiyudo na si papa gorio

sa dihang nabiyudo na si papa gorio
sige siyang kaligo sa banyo og aron makalimtan niya
ang iyang mga gihambin nga kagool
ako siyang gihangyo nga mobakasyon
una sa among balay nga duha ka undana
didto sa layo nga lungsod

og tood man mora og napiskay ang iyang kahimtang,
mipula-pula na ang iyang mga aping
og nawala ang pagpangliki sa iyang mga uga nga mga ngabil
og nauno-unoran na ang iyang mga tiil og bukton
tungod sa paglumpag kaniya sa usa ka kasakit
sa kalit nga pagpanaw sa akong mama francing.

aron mausob ang iyang kanunayng pagkaon sa karne
og mga mantikaon nga sud-an
gisukaran siya sa mga kinason sa iyang panihapon
sama sa mga sinabawan nga tuway og tinonoan nga aninikad

sa dihang iya na untang supsupon ang aninikad
siya mitutok sa unod niini
og siya nangagho

nangutana ko kon ngano
"morag maingon-ingon" siya mitubag

og pagkaugma samtang kaming duha
nagpabulad sa adlaw sa bag-ong og batan-on nga kabuntagon
sumala sa mando sa usa ka himsog og piskay
nga pangpakabuhi sa atong panglawas

siya mitan-aw sa ikaduhang undana sa among balay
og nangutana kon aduna bay nagpuyo didto

"ang among maid ang nagpuyo dinha" mao kana ang akong tubag

og siya nahilom, mitan-aw sa adlaw, namahid sa iyang singot og miatubang kanako nga morag nangamuyo

"sakit na akong oten, tagai unya ko og babaye
nga makalipay nako karong gabii
kon dili pwede ang imong maid
naa koy kwarta nga ibayad"
pagkaprangka gayod sa akong amahan.

nakasalom ko sa usa ka lawod nga kahinuklog.
unsa pod kaha ako kon moabot ako sa iyang edad og usab mabiyudo?

nagpaabot ka sa akong tubag?
ayaw na og pangutana.

Pamatia na lang sa pag-abre og pagsirado
sa mga pultahan sa pagbati og ang panagsabot
og pangtagbo sa kabugnaw sa kagabhion
og kahaw-ang sa mga bus-ok nga mga bukton
sa usa ka tinood nga lalaki.

hunahunaa kuno kon unsay
dangatan sa mga bintana nga dili na nato
abrihan?

sa mga buyog nga atong isulod sa cellophane
og sa lastiko atong hiktan?