mas subo ang akong mga balak kaniadto

oo
mas subo gayod
ang akong mga balak kaniadto,
una
mo akong nailaila isip usa ka bakho
sa usa ka flawta
nga akong gipadala kanimo
og ako miingon nga mao kini
ang akong kanunay
nga gipamati
samtang ako nagsulat
sa mga balak,

si carmen
sa iyang pagsayaw
sa tungang gabii
og sa kaadlawon,

pagkasubo gayod
nga pamation
ang musika sa flawta
og pagkasubo usab lantawon
sa sayaw
ni carmen
didto sa nataran
silong sa kahayag sa bulan,

kaadlawon,
mitug-an ka kanako
nga ang imong mga luha
mibuhagay sa imong aping,
imo lang nga gipasagdan
wala ka kaako
nga imo kining pahiran
sa puti nga panyo
nga akong gihatag kanimo
isip handomanan

sa kataposan natong pagkita
didto sa pantalan
ang mga anino gidala
sa usa ka sakayan
layo kaayo
og
nawagtang.

og didto sa lalom kaayo nga dagat
wala na igkita ang akong mga kamot
ang akong mga tiil
ang akong panagway
ang akong kalibotan