nagutana ka kong isda ba kanang naa sa sulod sa akong atabay
og miingon kong walay isda ang akong atabay
ang anaa lang diha tubig nga among ilimnon
og ang kalalom niana sama sa kataas sa pisi
nga akong gihikot sa timba nga mokalos sa tubig
aron ipaabot sa akong baba
nagduda ka gayod nga dunay isda kay nadungog mo
ang usa ka kisaw sa usa ka isda nga milukso lukso
sa tubig og nabutang sa imong huna huna nga basin
og namakak ko og duna pa akoy daghang gitagoan
didto sama sa mga lumot og mga gagmayng bato
og mga balas
mikatawa ko kay nangilabot ka na sa kalihokan
sa mga atabay nga unta daghan ka man kaayog
mga gripo didto sa imong balay.
usahay moingon unta ako kanimo
og pananglitan Inday og duna man ugaling isda
kanang isda nga nag magul-anon
kay siya napriso sa atabay og
wala gibutang didto sa kagawasan
sa mga suba nga kusog kaayo ang sulog
nga kanang kita makahawid sa mga kanipaan
kay hadlok kitang maanod,
ang akong pangutana, ibutang ta nga daghan
gayod tinooray nga isda didto sa akong lubog nga sapa,
unsa may imong kalabotan sa akong kinabuhi?
dili ka man unta nako mama, og bisan gani
sa buhi pa siya, wala gani siya mangutana.
No comments:
Post a Comment