pagpanglupad sa duha ka wakwak

ibilin ang mga sanina
sa kasayon didto sa katre
pakatulugon una
ang mga ugnan og mga habol
sa ilang kaugalingong
gitago nga kainit

kay karong gabhiona
manglupad na usab ang duha
ka mga wakwak
sa lawas sa duha ka dagkong
kwaknit

mangalap na usab og dugo
og unod
alang sa ilang pagpakabuhi
sa sunod nga mga gabii
sa ilang kahigwaos
kamingaw
og kasakit

mobalik silang duha sa
kaadlawon
sul-ubon na usab ang ilang
mga sinina og ugma
sa sayong kabuntagon
momata sila sa usa ka katingala

unsa bay nahitabo? nganong
naay dahon sa balimbing
ang atong katre?
nganong naay lapok ang
atong salog?

nganong nagsubo pa gihapon
ang atong kasingkasing?