paghinumdum sa kamatayon sa akong migo nga rebelde kaniadto

gipatay siya
atubangan sa iyang anak nga lalaki
sud sa iyang opisina

ang dugo og gagmayng
unod sa iyang utok
milagsik sa agtang
sa iyang anak nga
nagtutok sa sinuhulan

gipahinumduman ako
niya kaniadto
nga ang isog nga tabako
dali ra gayod nga
mahalin

mahanaw og dili na
gani mailhan nga mora
lang siyag milabay nga
hangin

apan pagkahuman sa tanan
ako unta siyang ingnon
nga ang aso seguro mawala man
apan ang kahumot sa
maong tabako
magpabilin sa akong galamhan