marietta og bert

si bert kauban niya kaniadto sa ilang kalihokan. nadakpan sila sa lasang og natanggong sa prisohan og didto sila nagkailaila pag-ayo
sa sulod sa mga kasakit, kapit-os kamingaw.

milantaw si bert sa lapok apan si marieta milantaw lang gihapon sa mga bitoon
didto sa sulod sa karsel sa mga gamhanan.

nakagawas sila sa pag-usob sa panahon.
nawala na ang kagabhion
mibanos ang kahayag sa adlaw.

talagsa na lang mouli si bert
og ang iyang mga anak
nga tulo kabook wala na gani
makaila kaniya.

si marieta anaa sa balay
naglutog pagkaon sa iyang
mga anak og ang iyang
mga anak nangita og
unsay lutuon dinha sa
gamay kaayong kusina.

si bert mibalik sa bungtod.
si marieta wala na.

wala mausob si bert sa prisohan
o sa gawas

si bert bert lang gayod gihapon
wala gayod makalimot
kon unsa ang tinood
nga pakigbisog.

napriso ang lawas apan
gawasnon lang gihapon
gikan pa sa una
ang iyang kalag.

og ang mga anak nagdumot
sa ilang amahan


og ang mga anak
wala makasabot sa sinugdanan
sa usa ka gugma
nga natawo sa usa
ka kalihokan.

gisukitsukit sa ilang
kamanghorang anak
usa ka buntag niana
ang ilang inahan
kon nahigugma pa ba siya
sa ilang amahan
og mitubag siya
"Basin"

og sa hunahuna
ni Marieta sa dihang
nag-inosara na lang
siya sa ilang balay
samtang nanilhig sa ilang
daghang sagbot nga salog
siya nakapangutana
sud sa iyang dughan
kong si bert nahigugma
pa ba usab kaniya

kabalo pa gihapon siya
sa saktong tubag
kadtong karaan
nga itubag sa usa
ka rebelde

nga mas bililhon pa
kaysa gugma
sa yutang natawhan.