ang pagkamabulakon sa kaminyoon

magsugod ang pagluib dili sa guba na daan nga salag sa kaminyoon,
hinonoa ang sinugdanan niini mao ang tumang pagsalig
nga ikaw og siya nagkasinabot,
nagmalipayon sa katam-is sa inyong pagdulog matag gabii,
wala ang kahaw-ang og ikaw wala na mangutana
kon anaa pa ba ang kulang nga panakot
sa inyong tinolang pulag ikog sa dakong yahong,
init nga sabaw,
og saktong timpla.

naglibog ka ngano nga mikalit
og hunong ang iyang sakyanan
og dunay miabre sa pultahan nga walay pananghid
og mas labaw pa sa usa ka tag-iya.

gihagkan niya ang iyang kwelyo
og iyang gidebuho ang lakra sa iyang ngabil
pinaagi sa usa ka pula nga lipstick.

nganong naay mikabit?
nganong dunay mikubit?
dis-a ba nagsugod ang
panagsumpay anang dili nimo madawat

pila ka ladies drink ang nahurot?
pila ba ka kiyod ang nagasto diha sa ikaduhang bilahan?

misulod ka sa kwarto, miiyak,
nakapangutana sa Ginoo kon asa ka nagkulang?
kon unsang parteha sa iyang lawas
ang wala nimo.

hawak? nanamin ka,
nindot pa ang gamay nimong hawak

ngabil? mas lami pa ang imo kaysa sa leche flan.
napungot ka.
Kinsa ba kadto siya?

Pag-abot niya sa inyong balay,
giatangan mo siya sa pultahan,
giaghat nimo magsulti sa dili pa manihapon.

Andam na usab siya sa pagtug-an sa laing bakak.
Dili kadto siya ang nagmaneho sa kotse,
gihulman lang sa iyang amigo nga dili niya mabalibaran
nga nagub-an og kotse sa dalan.

Og nganong magbuhat ba siya sa ingon?
"Gimahal ko ikaw sa tiunay,
balikon ko kana sa kanapulo" gihagkan niya
ang imong kamot og ngabil.
"I love you too", mibalos ka.

Sulbad ang problema.
Walay lalis walay away,
og dungan silag panihapon.
Nagdulog sila
Hubo ang ilang lawas
Sama sa naandan nga kainit og kalami.

Nasayod ang asawa sa bakak sa iyang bana.
Nasayod ang bana nga wala motoo ang asawa sa iyang bakak. Apan nahigugma sila sa ilang kaminyoon.
Og dili kini nila bungkagon.

Malipayon silang duha. Sa tunga sa nataran sa mga bakak. Namulak, namunga ang ilang kaminyoon.

Kabit lang siya, og kon pakusgan na ang sakyanan sa gugma, hayan mahulog ra gihapon siya.
Dili na siya molingi. Walay mopunit sa nahulog.