ang imong gitigom
dili kana sama sa usa ka pondo sa tubig
nga magpuyo lamang
sama sa usa ka
tadyaw
kanang imong gitigom nga pagbati
kanang imong gugma nga gitago
kanang imong pulong
nga imong giugom
sud sa imong baba
nga imong gihuktan
sa imong dila
og imong gipriso
sud sa mga rehas
sa imong ngipon
og pagluom diha sa imong
alingagngag
pagbantay lang kay kanang
uloran sud sa imong dughan
mabuak ra unya
pag-abot sa saktong panahon
og mogawas ang
ulod mokamang paingon
sa imong tutunlan og
sa tumang kagilok
nga dili na nimo mapogngan
maabri
ra gayod ang imong
baba sa usa ka
pagpanghatsing
og dayon mogawas ang
usa ka maanindot kaayo
nga alibangbang
molupad
makigsandurot sa hangin
No comments:
Post a Comment