ikaw nga lalom kaayog mga tutok

ikaw, kon makatutok ka morag bag aduna kay gihuboan
wala ang pahiyom diha sa nagpatong-patong nga mga tualya
nga imong nagamit sa pipila kanila

pila ba ka mantsa og buling sa lawas ang imong gitrapohan
sa matag adlaw nga ikaw maghimo og sala sa imong mga kamot
nga nagpaka- aron ingnon sa usa ka kainit sa usa ka gugmang gipangwilik sa imong mga puthaw nga kumagko
didto sa kilid sa mga katre nga natuskig?

ikaulaw ko man unta ang imong nabuhat
og akong gitagaan sa saktong mga sumbingay
ang mga tag-as 0g buhok nga nakiglambigit
sa imong mga bukton og nakigdula sa imong dila
og natiurok sa imong mga tilap og paak
nga nakapabuang sa ilang mga galamhan
nga nakapabuang sa ilang mga kuto diha
sa tunga sa ilang mga ayuyok sa ilang mga
buhok nga nakalkag og nangahulog sa
mga habol og ponda og sa pati sa mga salog

apan wala na akoy nahimo, sila ang mitugpa sa imong mga dughan,
sila ang misulod sa lasang sa balahido sa imong mga tiil,
sila ang naligo sa pag-ulan sa imong mga singot,
sila ang nangunay pagpangita sa busay sa imong mga tulos.

angay ka unta nga kasilagan og ipabilanggo diha sa mga rehas
sa mga pagbasol og itanggong ka sa isla sa pag-inusara,
apan sila mismo ang nangutana kon asa ka na
og unsa na ang nahitabo kanimo, sila mismo ang nangutana
kon asa ka nagpuyo og asa ka nila makita og mahikap og mahagkan

gidala nila ang kagilok sa ilang mga ilok,
ang pagtabisay sa ilang mga laway og ila kining gisugid diha kanimo,

ang uwang sa ilang mga kamingaw nga morag
mga iring nga nagpunay og panawag sa ilang mga kaatbang
sa usa ka malinawon kaayong gabii sa mga nagbaga nga kaulag.

ikaw ang hari sa kaulag
og ikaw ang ilang gipangita aron ampoan
ludhan, halaran og gani puy-an

sa paghawid nila sa imong bungot og ikog
sa paglingkod nila sa imong paa og paghalok sa imong pusod
langit na kana para kanila

og gamhanan ka sa imong trono nga bus-ok sa mga kaunoran
walay tingog imong gihupay ang mga bagyo sud sa ilang mga pus-on