nindot kaayong tan-awon nga
ikaw ang magtutudlo og
ako ang imong tinudloan
nga nag-atubang
kanimo nga durong
pamati
og ikaw nga magtutudlo
nagsigig sugid sa imong
mga pulong sa kaalam
punto per punto
naghatag sa mga tugon
kon unsay angayang
buhaton kon moabot
na ang mga bagyo
linog og baha
sa akong kinabuhi
kon sayod ka lang
nga sud sa akong dughan
kusog kaayo ang bulhot sa
hangin og ang akong kasingkasing
morag dahon nga napalid
sa akong gugma nga pakyas
og ang akong mga pagsalig
morag balay nga nangahirig
og ang akong pagtoo
morag mga kahoy nga
nangalukat og nangatumba
og ang akong nakat-unan kanimo
morag barko nga nangalunod
morag tawo nga misalom
sa suba nga lalom
milugdang og wala na
mitunga
nagpakaaron-ingnon ako nga namati kanimo
kay ikaw bisan kanus-a wala gayod usab mamati kanako
No comments:
Post a Comment