nakita nako ang dakong alibangbang
nga mibatog sa kilid sa akong pultahan
og ako na untang himoan
og usa ka nindot kaayong balak
kabahin anang kamatayon
og pagkabanhaw
bisan og sa mubo lang nga higayon
nga ako siyang masud-ong
apan kalit lang kining milupad
paingon sa mga dahon sa ylang-ylang
diin siya usa ka nagkamang lamang
nga ulod kaniadto
pagkaanindot niyang tan-awon
tapad sa mga bulak sa ylang-ylang
dili ko moingon nga wala
ako kahimog balak kabahin
sa kamatayon og pagkabanhaw
kining akong gisulat kabahin kini kaniya,
kadtong dako kaayong alibangbang
kabahin lamang kini sa iyang paglupad
og pagbalik sa iyang handurawan
sa iyang pagkaulod
gibati ko ang pagkabanhaw
nalimtan ko na ang kamatayon
nalimtan ko na ang balak nga unta
akong gisulat bisan sa hamubo
lamang nga higayon sa atong kinabuhi
No comments:
Post a Comment