ang xploytasyon sa lawas

ang xloytasyon nga ilang giingon dili mao ang pagbulad sa lawas sa adlaw
hangtod nga ang bulok niini mora nag napago nga kamote
nga giganggang sa pula og init kaayong baga
sa tulo ka kilo nga uling

ang xploytasyon dili ang pagpikopiko sa lawas
sa usa ka mananomay og humay didto sa basakan
mga morag mga kontoryonist nga imong makita
didto sa peryahan
kada pista didto sa Manukan

ang xploytasyon dili ang pagbitadbitad sa lawas sa lalaki
didto sa baybay anang mga pukot nga igaid sa hawak
og bitadbitaron paingon sa daplin sa baybayon
aron ka lang sa isda makakaon

ang xploytasyon kuno mao ang paghubohubo sa usa ka lalaki
diha sa entablado sa mga gaybars
og mga babaye dinha sa mga playboy clubs
kanang pagbasabasa og pagsabonsabon
sa ilang mga lawas
aron magnganga ang mana-away
nga mibayad og magpantasya
aron makaadto didto
sa langit
bisan og sa tan-aw lang
og wala ang
paghikap

bugnaw ang aircon sa sud
mahal ang bayad sa beer
og ang kakusog sa mga syagit
sa kaulag didtong lugara
morag mga graba nga gihuwad
sa usa ka dumptruck didto
sa stockpile sa nataran
sa negosyanting insik