kon mosulat ako og balak
sa gugma bahin kanatong
duha
gusto nako nga ang
mga pulong sama
sa mga sulog sa
tubig sa suba
tapad sa kanipaan
og mga kasagbotan
kanang naa ta sa
daplin unya molabay
ang dakong sulog
sa baha og wala
ta kabantay nga
naanod na kitang
duha
nanghawid ka sa
sagbot
apan naibot kini
nanghawid ko sa
nipa apan
nalangkat ang
dahon og ako
nadakin-as
og ikaw mihawid
sa akong kamot
og kitang duha
nangaanod
og wala ta
nanyagit aron
kita tabangan
nagpaanod lamang
kita sa dakong sulog
kuyog sa dakong baha
nga wala tang duha kabalo
kon asa ang
padulngan
No comments:
Post a Comment