mga bakhaw, mga buaya, mga halas , sawa og mga halo

ang mga katunggan daghang mga kamot sa bakhaw na mihawid sa tubig aron dili sila mamatay sa panahon sa paglutos sa umaabot nga ting-init

kon makahinumdum ka ang atong christmas tree gikan baya sa kahoy nga bakhaw kay daghan kaayo siyag mga tudlo

gipintalan og puti
gipamutangan og mga dulce nga senyorita og mga papel nga mga lainlaing bulok
gipamitayan og bisag unsa na lang aron lang gayod ipakita ang kabuhong ang mga kutsitsa sa atong kinabuhi sa gamay nga lungsod

niadtong usa ka semana misuroy ako sa atong katunggan
dapit didto sa atong beach sa Olingan
atua ang mga nipa atua usab ang mga kahoy nga bakhaw
atua usab ang bata nga nagguyod sa iyang sakayan
arong mamasol og mga isda

atua usab didto ang dili ma-spelling nga kalisod sa mga tawo
ang ilang sud-an mga tuway og mga saypo og gamayng kuha
nga mga poyo og haloan.

Wala na ang mga kasag didto,
og wala na usab ang mga buaya og mga halas og mga sawa og mga halo,

sa imong kasayoran atua na baya sila sa mga munisipyo nahimong mga magbabalaod og mga mayor
og ang uban nahimong mga senador og kongresman
sila mipaak sa mga lawas sa ilang mga igsoon,mikilaw sa ilang mga bukton, mibarbecue sa ilang mga unod, mibalbacua sa ilang mga panit,
milata sa ilang mga bukog,

og sa ilang kalipay nalimtan na nila ang ilang tinood nga mga tahas

Ang uban nahimong mga huwes usab sa mga korte.
Karong adlawa sulayan nako og panamin kon duna bay buling ang akong agtang, kon aduna bay dakong batang sa akong mga mata,
kon kahibalo pa ba akong moalsa anang dakong krus para kanako.

kon ako ba hinoon mokaon sa mga unod sa akong mga amigo?