sa atong kalibotan nga gipuy-an

lahi ang atong kalibotan
ang mga kagabhion adunay mga pako
ang mga dagat adunay mga dila
ang mga baybayon puti kaayog mga paa
nga nagbilangkad atubangan sa usa ka ulagan kaayo
nga nagpautog nga adlaw

ang mga kagutom gisabwan sa mga singot
ang mga utitod adunay mga laway
og ang kilomkilom nanaginot sa mga mumho sa kahayag
ang mga bagtok nagkitkit sa ilang mga bersyon sa realidad
ang mga gutlo nangiyogpos

ang mga hunahuna mga bongbong og mga dingding mga amang
ang mga sunflowers nanagdungo namalandong sa ilang kapakyas sa paghawid sa adlaw nga naligid didto sa ngilit sa kalibotan

adunay mga nagkawing nga naghawid sa kahilom
nagbaktas ang mga salumsom og ang mga layang dahon nagpaabot
sa pagdapat sa mga tunob anang kahaponon

ang uban miila kanato nga mga bato nga mga walay tag-iya
nga gikumkom sa usa ka palad.

mao kana ang atong kalibotan
kita nga nakahukom nga mahimong mga balakero.

nagmata og buntag ang mga buntag,
nangapkap ang mga kamot sa kagabhion
sa mga totoy sa kaadlawon nga naglas-ay sa kahigwaos og kamingaw

og wala gayod magdayon ang gugma sa adlaw og sa bulan
bisag nanganak na kini og daghan kaayong mga bitoon
usahay makapangutana ta kon asa ba sila
nag-sex?

nasakpan ang adlaw nga naglolo sa sayong kabuntagon
og nagawsan og daghan kaayong bidlisiw ang dako kaayo niyang ...

ambot sa imo!
ang dagko kaayo niyang mga kamot.

(hmmp, malisyosa ka no?)

og ikaw,dili ba gahapon mikaon ka man og mga gagmayng papel
aron unta magkalibanga og mga balak?

di na lang ko mag-tell.
True or false?