ang kahaw-ang

ang kahaw-ang sa usa ka tasa
dili kana mapuno sa kainit sa
tsa nga imong gihuwad didto
dili kana mahupong sa bulok
nga lunsay o mantsa sa pula
dili kana makabati sa kahingpit
kon dili kana nimo hawiran
sa imong mga kamot og ipadapat
sa imong mga ngabil og imong imnon
ang iyang gihambin nga katam-is.

Sa imong baba diha mawagtang
ang iyang kahaw-ang.
busa pagkahuman nimo og butang
sa ininit nga tubig
og tusno sa usa ka pinutos nga tsa,
ayaw biyai ang tasa sa iyang lamesa
hangtod nga kini mabugnaw
hangtod nga kini mawad-an
sa iyang pangagho
sa dihang ikaw mibiya
og walay saktong saad
kon kanus-a ka mobalik.

Bisag mga hunghong
na lang sa imong saad,
sarang na kining makahupay
sa iyang mga tinagoang
lalom nga kahaw-ang.