tyobibo

tyobibo
sama sa kinabuhi
usahay ubos ka
usahay naa ka sa taas
naglantaw sa tanang gagmay
nga lamigas

naghangad sa mga langgam
nga naglupadlupad sa kalangitan

tuyok tuyok lang ang tanan
walay permanenting naa sa taas og sa ubos

karon naa ka sa ubos
og ako naa sa taas

nakita ko ikaw sa ubos
nga nagpaabot kanako
og ako ania nagpaabot
usab nga monaog

aron kita magtagbo
aron ikaw akong magakos
og mahagkan

apan unsa bang hitaboa
nga ikaw misakay man usab
sa imong mga pangandoy

og karon nga ania na ako sa ubos
ikaw naman usab hinoon ang naa sa taas
og ang wala nako masabti
ngano nga ako imo man nga giyam-iran?

wala ka ba kasabot
kon unsa ang pagpasyensa
kon unsa ang pagpaabot?

sayang.
karon monaog na ako
og mobiya
gawasnon na ako niining pultahan
sa tyobibo sa atong kinabuhi