si hanski og si panski

si hanski nagsulti kang panski
nga nagdamgo siya og
karsones nga corduroy
brown og kupas na nga corduroy
sa kaadlawon

si panski siging busy.
walay panahon anang damgo
ni hanski
kanang kupas og brown nga corduroy
nga karsones

si hanski nagpang-os og tubo
dula sa iyang dila og ngipon
ang iyang kabatan-on

si panski lahi kay sa bata pa
siya ganahan siyang
motila sa iyang plato
pagkahuman og kaon sa iyang
paboritong leche flan og
puto.

si hanski og si panski mga lalaki.
dili sila magsoon.
nagkita sila nga dagko na.
sila karon ang nag-ipon.

si panski pobre si hanski ang
dato.
gusto unta ni panski nga
mogawas sa baba ni hanski
apan
napriso siya sa kaayo ni
hanski.

gusto unta ni panski og anak
apan si hanski
usa man ka lalaki.

gusto unta ni panski nga
mohawid sa kamot sa usa ka babaye
apan nanaad si hanski
nga og dili siya ang makapatay
siya ang magpakamatay.

mao kana ang kalibotan
ni panski og ni hanski.

karon tigulang na silang hanski
og panski.
patay na sila. daghan ang nagmahay.