sa ilang pagkagawasnon

dili taas ang ilang
nakab-ot nga edukasyon
sa panahon sa ilang
pagbakwit-bakwit
sila nakaundang
kay nangahadlok
sa pagsulong sa
mga hapon

mitago silang lola
pacing og lolo enggoy
didto sa bukid sa Milad
diin sila nanginabuhi
sa ilang kaugalingong
paningkamot:

nagtanom og tubo
para makahimo og
asukar
namuhi og mga baboy
aron adunay ma-adobo
namuhi og mga manok
aron dunay mga itlog
sa ilang pamahaw
nagbuhi sila og
mga baka og kabaw
aron duna silay gatas
nga mainom og
mga kusahos nga
maukit

ang ilang ginamos
tinadyaw
ang ilang mga isda
gikan sa mga sapa
og suba nga nanglabay
sa kabungtoran


sa ilang panahon
wala nila gikinahanglan
ang kwarta
ang mayor og gobernador
nga modikta kanila
wala nila pangitaa
ang mga silingan
wala nila hunahunaa
kon kinsa ang
makatabang kanila

sila-sila lang
sila lang ang nagtabang
sa ilang kaugalingon
sila lang ang naglubong
sa ilang mga patay
sila lang ang nagbunyag
sa mga ngalan
sa ilang mga bag-ong
nahimugso sa mga
sabakan sa ilang
mga inahan
sila lang ang nagdaro
sa ilang kaumahan
sila lang ang nagsilot
sa ilang kaugalingong
kalapasan
sila lang ang nangabre
sa ilang mga bintana
og mga pultahan og
sila lang gihapon ang
nanirado niini

sila sila lang gayod
sa ilang kaugalingong
kalibotan

wala sila miingon nga
sila nagmalipayon
wala usab sila miingon
nga sila nagmasulob-on
wala usab sila nanghambog
nga sila angayan nga
awaton

sila-sila lang
sa ilang karaang panahon
og hangtod karon
kami-kami lang gihapon
sa among pagkagawasnon.