og busa kita
nga sa ilang mga panan-aw
morag mga irong gauwang sa tungang gabii
atubang sa takdol sa bulan
sa kilid sa mga bakak nga kakahoyan
nahimong ilang kataw-anan,
"tan-awa ang mga irong buang
nagpunay og uwang
sa mga sayop nga kakahoyan
sa tibook nga bulan"
kita nga mga iro sayod
nga kita nag-uwang sa bulan
nga walay dunggan
sa mga kahoy nga bakakon
sa tungang kagabhion
diin nahikatulog
ang tanan
sayod kita niana,
apan ang wala nila masayri
nga kini atong tanan
sayod ang tanan
nga ato kining nasunod
atong mga ginikanan
mitapot sa atong mga unod,
mga bukog,
sa atong utok
miuwang kita
dili aron madungog
dili aron matabangan
kay sa tinood wala kita nanawag og tabang
wala kita mangayo niini
miuwang kita kay lami ang pag-uwang
miuwang kita
dili kay aron makita nila
ang atong mga hait nga mga bangkil
ang atong dila nga talinis
nga morag bangkaw
miuwang kita kay mao kana kita
mga iro sa ilang panglantaw
pamatia. pamatya.
tindog. tutok. takbas.
No comments:
Post a Comment