mas nindot ang pagsulat kabahin sa pagbiya

mas nindot ang pagsulat kabahin sa pagbiya
mas lanog sama kalanog sa paglamba
sa pultahan sa imong paggawas sa balay
nga walay panamilit kanako

duha ka lamba ang madungog
una: ikaw
ang ikaduha: ako

atong gisabot ang kahimtang sa mga pultahan
kahinumdum ta adunay panahon nga sige ra kining sarado
morag baba nimo nga tak-om kaayo
morag akong mga kamot nga hipos sa akong bulsa

atong gikalimtan ang pagkaguba niini kadtong
kalit lang kining nahapla sa salog nga morag
babaye nga gikuyapan sa kagutom og kauhaw
wala lang kini mikirig kay medyo adunay kataha
sa nagpuyo sa maong balay
ang bag-ong magtiayon gikan sa syudad

tulo ka semana ang imong gipangayo nga karyo
sa atong panagtagbo pag-usab
kay lagi gipangayo nimo ang kahilom og ang
gahom sa paghinuklog diha sa imong pag-inusara karon

ako untang pangayoon upat ka semana apan
gibati ko usab ang kahadlok kay dili na baya ako makatulog
nga mag-inusara
daghan na akog gikahadlokan og usa niana kon
mamatay ako nga ako usa ra diha sa
katre nga tupad mao lamang ang mga alugnan
nga nabasa sa akong kaugalingong mga singot

ikalima ka semana napul-an ra gayod kita anang
mga panglood sa mga ulod og kasuko sa mga aliwang

nagtext ka: gimingaw na baya ko nimo dodoy.
mibalose ko: ka-eyoton na baya ko nimo inday.

mikatawa ang imong selfon. "ha ha ha ha buang!'

nindot man ang pagsulat kabahin sa pagbiya
gisulat ko na kini atong pang miaging semana
apan sa tinood lang
mas nindot sulaton ang atong panag-uli

ang tingog sa pultahan hinay kaayo sa imong pag-abre
kay anaa kanimo ang yabe
og ako ania na naghay-ad sa atong katre
ganiha rang nag-paabot

kining imong buang nga bana, wala nay brief

kay bulingon na ang tanan og ugma imo nang labhan

abli na ang pultahan
alang sa tanang: sulod na, dalha ang mga bitoon pati na ang bulan
mao ka na ang imong mga pulong.