kaniadto sa imong kagamhanan

kaniadto sa imong kagamhanan imo akong gipalohod sa imong atubangan
bisan og nag-iyak na ako sa kasakit sa imong pagtunob sa akong pagkatawo
imo akong gipakanta imo akong gipasayaw og ila akong gikataw-an silang imong mga kauban sa pagpakaulaw kanako

x x x
wala nagsilbi ang imong gahom sa mga kamot og pusil
og sipa sa imong mga tiil
nahimong abo ang imong kaisog
natay-an ang gato sa imong pistola
og ang imong tiil napiang ra sa kataposan
mora ka og palasyo nga natumpag sa
usa ka pamilok lamang

x x x
karon nabali na usab ang panahon
mitihaya ang mga paya og ako nang panahon karon
ang akong mga bali nga mga bukog
natubuan sa mga unod
og gani nausob ang kinaiyahan
gitubuan ako og mga pako sa akong kilid,
og ako gitagaan sa kapalaran nianang gahom sa paglupad
lig-on na ang akong mga tiil ug ang akong kamot
og ang akong baba makamao nang maghimo og mga kalayo

x x x
karon ikaw na usab ang anaa sa ubos
miluhod ka kanako
giyukboan mo ako
og nagpunay ka og pangayo og pasaylo

nangutana ka kon silotan ko ba ikaw sa kamatayon
og ako mitubag
tindog diha igsoon ko.

ang kalibotan og kalangitan ang mosilot kanimo
wala akoy gahom niana
wala kanako ang pagpanimalos o
pagsudya kanimo

tindog diha igsoon ko.
gusto ko nga motan-aw sa langit nga karon nalooy pag-ayo kanimo.
gusto ko nga moduyog sa kurog sa kalibotan nga karon modawat kanimo.

ikaw ang among igsoon.
tapad kanamo.
mangaliyupo kita kaniya.

ang Dios sa langit sa yuta.