mY secreT ponD

ang atong mga hunahuna
sama baya sa mga daghan kaayong
mga isda sa ilalom
sa dagat

nagpunay og langoy
langoy
libot suroy
sa mga lawod
wala tingogtingog

nangita anang
wala
lang god

sama karon
ikaw og ako

ikaw kunohay
nagbasa niining akong
gisulat

og ako kunohay nagsulat
ining akong mga
hunahuna

apan unsa ba ang
unod sa akong
gisulat

pangitaa kuno
kon unsa
ba ang unod?

dili ba wala.

bisan bukog
wala pod.

apan duna kini
dako kaayong ugat
nga nagsumpay
sa atong duha
ka mga isla
sa kalaay

mao kana ang tulay
kanatong duha

gidawat ko na
ang mga miabot
ikaw lang ang
akong gipaabot
nga modawat
usab niini

kanang hilaw
nga katawa
nga gitusno
sa mawos
kaayong ginamos
sa atong
gipanaad nga gugma

morag mga isda
hugpong sa lawod
sa dagat

ang atong mga hunahuna
nga unta
kitang duha lang gihapon

nangita man god ta
anang wala diha

pamati ba.
dili ba ang atong sabot
mao lamang
kon unsa ang naa
pa diha
diri, og didto

morag mga isda
manglangoy tang duha
paingon
sa layo kaayo

kanang dili na kita
nila mahinumduman
bisan og balas
nga gikoloran
diha sa garapa