ang kritiko

dili ka nako mabasol kay ako ang nag-aghat
dayon sa akong balay karong adlawa og sa umaabot pa nga mga adlaw saka sa akong hagdan nga karaan
wala pa gayod malamposohi ang iyang mga ang-ang

palihug og tan-aw sa iyang mga hawiranan
kinahanglan pa bang silakan o pintalan ba hinoon?

dali saka sa akong sala og palihug og lingkod sa akong mga lingkoranan nga ginama sa mga kawayan nga batakan
gipaslotan sa mga gabaga nga puthaw aron mabutang ang mga ilhanan sa akong mga ngalan

mangadto ta sa akong katulganan
sa katre nga tugas nga akong sinunod sa akong mga ginikanan
dunay mga tinagoan nakong mga gilumutan sa tumang kadaan
ang mga isda sa gamay nakong aquarium patay na
og ang mga suga sa kilid nangaponder na

wala koy plano nga alisdan kay mas giganahan ko
sa mga dulom og kangitngit

mangadto nya ta sa akong talad kan-anan
walay baseyo sa beer o tanduay
apan daghang garapa sa mga tambal nga wala nay mga sulod
og ang mga resita sa doktor gihapnig sa kilid sa lamesa
diin anaa ang akong antipara

dinhi niining lugara masilip mo na ang akong gamay kaayo nga kusina og sa kilid naa ang akong kasilyas
lingi ka sa taas
ayaw katingala ngano nga dunay buslot ang atop nianang dapita
kay kon ako malibang dili ko magbasa
pungko ko ug dayon lantaw sa mga nanglabay nga mga bitoon

dali dayon ta sa akong veranda
sultihi ko samtang manglingkod ta

unsa ba ang imong nakita?
dili puti ang sanina sa akong mga damgo
dili pod itom
dili hapsay ang mga sidsid sa akong mga saad
dili sab hinoon kaayo kum-ot
wala nay kwelyo ang akong mga paglaum
dili na long pants ang akong mga pangandoy
wala na ang singsing og kwentas sa akong ambisyon
mibaga ang antipara sa akong mga pangutana
og nawala ang mga butones sa akong mga tubag
nga unta mohulip sa akong mga nagnganga nga mga ohales.

kon mobiya ka na niining akong balay nga karaan
sultihi silang tanan sa mga hagdan nga dili na sinaw
sa mga haligi nga nangaharag
sa mga bongbong nga nangabuslot
sa mga bintana nga nagpunay og
sa mga pultahan nga gilamba
sa atop nga giabrihan sa bagyo

sultihi sila nga ako wala nay plano sa pagpaayo aning balaya
kay sama kanimo ako mobiya na usab
kuyog sa akong laing mga plano.

ang magpabilin dinhi mao lamang ang mga maot
ang mga buang og ang mga walay buot.