pasensya na lang una diha Issa
kay unsaon ta man
tapolan ang imong amahan
witwitan ang imong inahan
baldado ang imong lolo
og ang imong lola haskang bugoa
pasensya ka na lang una diha
paabota lang ang umaabot nga ugma
pagkalo lang una kay basin og mag-ulan
sip-onon og hilantan ka unya
pasensya ka na lang una diha
paabota lang nga ikaw modako na unya
ipakita nila nga lahi ka kanila
nga ikaw walay gana nga mahisama nila
ingna ang mga kakahoyan og kapanganoran Issa
nga ang mga baliti namunga na og mga mangga
ako gani Issa suginlan ko karon ikaw
bayabas man nga gikan sa kahoy nga pakaw
No comments:
Post a Comment