gisuginlan ko niya kabahin ni Ike

duna kunoy bag-ong tripping si Ike
kanang tag-iya og funeraria
sa syudad sa Dipolog kay lagi
dili na man kaayo halinon ang
mga mahalon nga mga lungon
naglingawlingaw na lang kini
sa iyang kaugalingon kuyog sa
iyang mga ka-berks----

ang pagpamasol didto sa Surf,
naghimo silag gamay nga balay
nga nipa daplin sa baybay og
dunay gamay nga morag tulay
diin silang tanan magtug-away
sa ilang mga pasol nga ang mga
paon wati og gagmay pasayan

kay wala man lagi kaayoy isda
na ang dagat nga gihimo na lang
nga kalibangan sa mga tagadidto
aron gayod malingaw manganta
na lang sila sa mga Asin songs og
dayon og papalit sa tuba og
preskong isda didto sa merkado
aron ilang sugbaon og sumsuman.

naglingaw-lingaw na lang si Ike
sa kamingaw niya sa iyang asawa
nga dugay rang misutoy sa Amerika
kuyog sa iyang mga anak nga dalaga
nga nangamaw didto sa Chicago.

ang mga kuyog ni Ike kadtong mga
engineers nga bag-o lang nataktak
sa ilang trabaho. Ang uban kadtong
wala gayod katilaw kon unsa ang
trabaho. Namaon lang basin og
makakuha og swerte sa kadugayng
nilabay sa ilang mga pasol didto
sa dagat nga walay lami kay gihimo
na lang nga kalibangan sa mga tawong
walay lami usab sama kanamo.

ikaw aduna ka bay pasol? kon wala
palihog pahawa, kay lami pa gihapon
ang imong kinabuhi, kay kining akong
gisulat, para lang kini sa mga walay lami
nga sama kanamo. Duna sab koy pasol.

gikapoy ka og basa sa kataas niining
estorya nga walay lami? Sakto ka

dili taka mabasol, kay ang kinabuhi
karon wala nay lami, og kaming tanan
dinhi wala nay lami, ikaw lang seguro
nga nag-antos og pagpangita kon asa
ang lami, og unsay laming basahon ang
dunay lami ining atong kalibotan karon.