mY secreT ponD

sa pagkahuman natog halok
(ug uban pa nga dili na angay pang isulti
sa hangin ngadto sa mga kabulakan)
nangutana ka kon unsa ba ang tinood
nga bulok sa gugma.

pula siempre, mitubag ko samtang
nagtaod og balik sa akong brief nga
mibatog didto sa gamay nga lingkoranan
sa imong tokador.

mamahimo ba nga dili lang pod pula
kay morag komon ra man kaayo ang
pula nga rosas karon, misambat ka
samtang nagtagkos sa imong bra.

pwede pod itom. pwede pod puti.
pwede pod gani violet. pwede bisag
unsa nga bulok. pwede gani nga walay
kolor ang gugma.

kanang matuod nga gugma. miinsister
ka mipabulhot sa imong sigarilyo
sa kisame. Imong gisudlayan ang
imong buhok.

sori. moadto na ko. kapila ba ako
moingon kanimo nga kining atong
gibuhat, walay labot ang gugma.

walay labot ang mga balak. walay
labot ang ubang mga tawo. wala
kay labot. wala koy labot. dagko na
kitang misulod niining kwartoha.

usa ka ka dakong langgam nga
mibatog sa akong sanga nga mikaon
sa akong hinog nga bunga.

gilamian ka. giganahan ko sa imong
mga pako. walay mga panganod sa
atong panagtagbo.

Lupad na. Nagbasol ka? Balik lang
Kon ganahan ka. Daghan pa kaayog
mga bunga ang akong mga sanga.

Pahawa na palihug. Aduna pay laing
langgam ang mobatog dinhi.