gipahibalo ko ikaw higala nga nadawat na nako ang mga hulagway nga imong gi-email kanako
kabahin sa inyong tingtugnaw dinhang dapita
usa ka karaang balay nga haskang dakoa og napuno ang atop sa esno
usa ka dakong kahoy nga wala nay mga dahon nga ang bulok sa iyang mga sanga itom kaayo
usa ka nataran nga gilibotan og natambakan sa baga kaayo nga esno
nga haskang putia nga morag misupak sa kadulom sa inyong panahon dinhang lugara
akong gitigom ang tanan,
akong nabati pag-ayo ang kabugnaw
morag madungog nako ang hangin
morag misurop sa akong mga panit
ang paghunong sa dagan sa kainit
mikurog ko sa tumang kamingaw.
og lain poy ato,
kumusta na ba ang imong gana sa paghimo og mga balak?
No comments:
Post a Comment