usa ako ka bula nga gikan sa commercial nga sabon

usa ako ka bula nga gikan sa commercial nga sabon
usa ka Tide
sabon panglaba lang
detergent soap

kon imo akong ihuwad sa tubig
og dayon imong kutawon sa imong mga kamot
isamkon mo ako

kon imo akong itapad sa imong panty nga bulingon
og imo akong ikuso-kuso didto
magmalipayon ako

kon imo akong ipauraray sa imong palad
og tayhopan sa hangin nga gikan sa imong dughan
agi sa imong ngabil
mogawas ako sa akong gitagoan
kay ako ang bula
sa usa ka commercial nga sabong panglaba

makita mo ako nga hubo sa imong panumduman
maglupad lupad ako sa kahanginan sa imong mga damgo
sa mga gabii nga ikaw nag-inusara
giuhaw sa hugot nga gakos sa himaya
og kalipay

tan-awon mo ako sa akong kanipis
sa akong pagkabula
mogilak ako sa kilid sa kahayag sa adlaw
sa bag-ong kabuntagon
og tayhopon ako sa hangin palayo kanimo
og bisan kanus-a
dili mo ako mahawiran

moboto ako og dayon mawagtang