UPAT KA BALAKEROS

Upat ka mga balakeros naglingkod alirong sa usa ka bol nga tuba ibabaw sa lamesa.

Miantog ang unang balakero: aduna akoy ikatulong mata nga makakita sa kahumot niining usa ka bol nga tuba, nga ang kaalimyon nanganawkanaw nga morag mga panganod sa mga langgam sa usa ka balaan nga kagwangan:

Og mibalos ang ikaduha: sa akong sekretong dunggan nadungog nako ang awit sa mga

Kalanggaman, ang ilang mga huni mihambin sa akong kasing-kasing, sama sa pagpriso

Sa buyog diha sa mga puyos sa puti nga rosas”

Og ang ikatulong balakero mipiyong sa iyang mga mata, miisa sa iyang mga kamot paingon sa langit og mitiyabaw: akong gihikap sila sa akong mga kamot. Nabati ko ang ilang mga pako, sama sa mga ginhawa sa mga nahikatulog nga mga nimpha, sa kilid sa akong mga tudlo”

Og ang ikaupat nga balakero mikuha sa usa ka bol nga tuba og miingon: mga higala dili na hait ang akong pangdungog, ang akong panan-aw dili na igmat, og ang akong panghikap gikubalan na. Dili na nako maaninaw sa akong panimhot ang kahumot sa tuba, dili na nako madungog ang iyang awit, dili na nako

Mabati ang pagkayabkayab sa iyang mga pako. Ang akong gihawiran kining usa ka bol nga tuba na lang.

Ako kining imnon aron mahait ang akong salabotan og mga mautgan kining akong pagbati aron ibayaw ako sa

Iyang mga pako didto sa mga kumpol nga panganod sa himaya og kalipay”

Ang tulo ka mga balakeros, mitan-aw kaniya, abre ang mga baba, morag dili pa katoo nga

Gihurot pagyarok ang ilang usa ka bol nga tuba, og nanglad-ok sila sa ilang dili matukib nga kaibog og kauhaw, og dunay dili mabalay nga balak sa kasilag nga napatik diha sa ilang mga mikunot nga mga agtang.