ugma na nako sulaton ang kabahin sa babaye nga adunay mga gamot

ugma na nako sulaton
ang sugilanon kabahin sa usa ka babaye
nga adunay mga gamot ang iyang lawas
nga nagpugong kaniya paglakaw
palayo sa iyang kamingaw

ugma na nako sulaton kon
nganong migamot ang iyang mga kamingaw
diha sa iyang gitindogan

ugma na nako sulaton
nganong wala siya matabangi
sa iyang mga silingan

ugma na nako sulaton
nganong siya mismo nalingat
og wala niya maputol
ang mga gamot sa kamingaw

ugma na nako sulaton
kon giunsa siya pagbuntog
sa mga gamot sa kamingaw

ugma na nako sulaton kining tanan
ngano nga ang tawo nagmingaw,
ngano nga ang tawo usahay pildihon
niining mga panghitabo sa iyang kinabuhi
nga unta siya man
ang tinood nga hari nga naglingkod
sa dakong trono sa iyang kaugalingong lawas

ugma na
kay ako ania naglipay usa sa akong kaugalingon

ugma na
mangayo ako og karyo kanimo
gusto ko ikaw nga tabangan
ikaw nga wala na kalihok
ikaw nga daghan na kaayo og mga gamot

ugma na ugma na ugma na
wala akoy gana nga mosulat
kabahin anang mga kamingaw

ugma na lang gyod
kay ania ako sa tunga sa akong kalipay

ikaw ang nag-amoma
nianang mga gamot sa kamingaw
ikaw ang mag-antos niini

imo kining tinoyoan
natural lang nga imo kining pagaantosan.