sa kamatayon sa imong minahal

wala ka molakaw sa ibabaw sa tulay
minaog ka gipangita sa imong mga kamot ang dagan sa suba
imong gikagdos ang tubig sa imong palad
nga naghulma sa usa ka paya
og imong gibasa ang imong nawong
gibisibis nimo ang tubig
aron mabati ang kabugnaw
diha sa imong panit

mipahiyom ka sa makadyot atubangan sa usa ka kahoy
nga landong
dili tinood nga pahiyom, hilaw kaayo
gikan sa imong gasakit nga dughan
nga morag moboto
apan imong gipugngan

mikalos ka sa tin-aw nga tubig
sa makaduha sa makatulo
og imong gisalod ang tubig sa imong baba
aron ka makainom

gikapoy ka na pag-ayo gusto gani nimong molabang sa suba
apan lalom kaayo kini
aduna ka pay mga saad sa nangabilin
og ilubong pa nimo ang patay nimong minahal

gihulma sa imong palad ang usa ka pangaliya
nakita mo ang pagpanagak sa tubig
sa mga lat-ang diha sa imong tudlo:

oo, tinood ang tubig mabalik gayod sa iyang gigikanan
ang suba mobalik gayod sa dagat
og walay makasupak niana.

Giinom mo ang tubig gusto nimo kining hiposon
hangtod sa kahangtoran diha sa imong baba
sa imong dughan sa imong kasingkasing
apan bisan pa niana, dili gihapon kana mahimo.