Pasayloa

pasayloa
ako igsoon ko

apan dili sa tanang panahon
nga ako ang imong
magulang

ang imong daganan
sa tanan nimong kalisud

ang imong pangayoan
sa imong pagkawala yamo

pasayloa
kay adunay panahon nga ang akong
kamot dili na moabre

ang akong mata dili na momata
ang akong mga baba dili na makatayhop
sa imong mga puling diha sa imong
mga pilok

pasayloa kay miabot na ang panahon
nga ako mopahulay na
sa pagpangga kanimo

wala na akoy angay nga ihatag pa
o ihanyag kanimo aron usab ako imong panggaon
og ilhon nga usa ka igsoon

pasayloa miabot na ang kataposan
sa akong pagpailob
wala na akoy ikapahulam wala na akoy ikapaambit

gawasnon ka na
og karon akong pangandoy nga ikaw mabuhi na nga mag-inusara
ikaw ang salampati nga akong buhian sa akong mga kamot
ako ang kahoy
ang akong mga dahon nangahulog na nangalaya na

pasayloa
ihatag ko na ang imong kagawasan
wala ka nay madawdaw pa kanako

wala nay tubig ang akong mga sapa
wala nay bulan ang akong kagabhion
wala nay adlaw ang akong kabuntagon

manirado na ako sa akong pultahan
gabii na
gusto ko nang matulog nga malinawon

pasayloa ako igsoon ko
karon na ang akong panahon
gusto ko usab nga
magmalipayon sa akong kaugalingon