palihug lang langga ayaw ko og ilara nianang
usa nimo ka halok
nga imong giawat sa karaang halok ni Hudas
(kay dili baya ako si Kristo
nga imo unyang ilansang sa krus)
palihug lang ayaw ako og ilara nianang imong
nipis kaayo nga halok
nianang mabaw kaayo nimo nga sapa
kay ako dili na bata nga molangoy lamang
diha sa daplin sa imong dughan
palihug lang ayaw na ko og ilara nianang imong
usa ka gamay kaayo nga halok
kay dili na nako kana mabati
ayaw ako pasaligi nga ang mga lamigas
kay aron matampisaw sa imong katam-is
o ang mga langgam magpabilin sa ilang
mga salag silong sa imong
halok nga bugnaw pa sa mga dahon sa kahoy
palihug lang ayaw og paningkamot nga mapuyok
pa ko nimo sa imong mga halok
dugay ra akong nahimong bato
nga dili na malumos sa imong mga sapa
dugay nang milayas ang mga langgam
og dugay nang nangamatay ang mga lamigas.
No comments:
Post a Comment