origami

paghimo anang
baroto nga papel

ipalutaw sa sapa
ipaanod

tan-awa sa unahan
hangtod kana
siya mawala

sa imong panumduman

nasunog ang papel
nga baroto sa imong
hunahuna

morag newspaper
morag imong balak

nga papel, gisunog
sa ilang kalimot

imong balak nga
gikomot sa ilang
kahimoot

paghimo sunod
anang balak kabahin
sa papel nga
nakom-ot

kabahin sa ilang
nawong nga
nagkulismaot

pagkahuman kon aduna
ka pay panahon
hingot-i ang imong
kaugalingon

i-click sa imong mga
fingernails ang imong
mga kuto

kay daghan na kaayo.

time sa, nganong gikan
sa origami
sa papel nga baroto
miabot ka man
nianang kuto....

well, hunahunaa kuno
pag-ayo nganong
nag-abot ang luwag
og ang kasili?