og siya milatay baya sa alambre

tungod sa sugo sa iyang hinigugma
ang ulitawo nga
(kalooy sa dios wala pa intawon
matuli tungod sa iyang pagkatalawan)
milatay sa usa ka alambre
nga gihukot sa duha ka punoan
sa lubi nga tag-as na kaayo
sa kakaraan niini

milatay siya nga morag hulmigas
sa usa ka lambo
morag iyang gugma nga hinayhinay
nga milatay sa usa ka ugat
sa kasingkasing sa iyang
hinigugma

og tuod man wala kini siya
mahulog
nakatabok sa pikas nga lubi
pinaagi sa paglatay sa
alambre

nalipay si inday, mipakpak
og iyang gigantihan sa usa
ka halok
si dodong nga iya usab
nga gihigugma

ang dakong talawan

ang dakong kataw-anan
mao nga sa pagkatinood lang
kon didto ikaw nakatan-aw

ang alambre baya
nagdapat sa yuta.