iring

adunay iring
gibidli, adunay iring nga gibidli
kanako, adunay iring nga gibidli kanimo,
iring nga bulawan og balahibo ang gibidli kanato
misulod sa atong lawak kay ato mang giabrehan ang
atong mga bintana og pultahan og ang iring nga gibidli kanato
diha sa kangitngit mikatawa nga mora og baroto nga bulan
og dayon siya nagmiyaw kay kuno kitang duha puros man gamingaw
og dayon siya nagsigi miyaw miyaw miyaw
og kita baya wala malingaw sa iyang pagpunay og miyaw miyaw miyaw
og ikaw mora naman hinoog nalingaw
apan ako misugod na og tiyabaw og gigukod ang iring nga kanato gibidli
nga akong nadakpan og akong gitook og akong gilabay didto sa gawas sa atong bintana
og ako nanirado sa atong mga bintana og pultahan
napungot nanglood

og unsa bang hitaboa nga karon
ako naman ang iring nga gibidli
ania nagmiyaw
nagsigi og miyaw
miyaw miyaw og ikaw
anaa nagisigig katawa kay ikaw kuno nalingaw

hinoon, nawagtang ang kamingaw.