exuperio

ang iyang gipuy-an ang magsulti sa iyang tinood nga kahimtang kaniadto: tulo lang ka ang-ang ang ilang hagdan gabok, daghang lapok ang tiilan. usa lang ang lawak, giipon ang kusina, katulganan, ang pantawan, ang tanan. nagpungko siya sa usa ka bangko. mitutok sa kawanangan. wala ko katoo. apan mao kana ang tinood. kon makita mo lamang ang kadaghan og kadako sa iyang mga damgo, malisang ka, dili masulod sa usa ka dako nga barko. ang iyang tatay natulog sa ubos sa ilang balay, tapad sa mga tae sa baboy, hubog kaayo. Ang iyang nanay nagpunay og ubo,dunay mantsa sa dugo ang iyang hugaw nga panyo. walay hugas ang ilang kaldero, gani walay bugas, walay sud-an. apan sa una pa kana. karon si exuperio asenso na kaayo. pagkasinaw sa iyang sakyanan. pagkadako sa iyang balay. pagkadaghan sa iyang mga suluguon. pagkaanindot sa iyang polo og karsones. karon siya pagkagarboso na. daling masuko, nagpunay og singhag kay kuno ang tanang tawo sa iyang palibot mga dangag, mga estupido. karon, siya ang dakong bakak. kaniadto siya ang gamay apan tinood. nasayangan gayod ako kang exuperio.