didto sa sapa

didto sa sapa mibuhagay
ang daghang tubig nga morag
mga tawo nga nagdagan
nagdali sa ilang pagpahawa
gustong mopalayo
gustong dunay abton

gibarahan sa dagkong mga bato
sa tunga
sa kilid
sa daplin

mibula ang sapa sa kapungot
og ang mga kahoy namulak
nga morag nalipay
sa ilang gilantaw

og ang mga lumot sa lawas
sa mga bato
mikaylap nga morag ap-ap
sa ilang mga aping
nga mora usab og
giganahan sa iyang
kahimtang