ang pagsulat, bow!

kinsay gaingon nga lisod ang pagsulat? sayop kana.
kinsay gaingon nga lisod ang paghunahuna? sayop gihapon kana.
kay ang pagsulat mao ang paghunahuna og ang paghunahuna baya
kada adlaw natong gibuhat.
Bisan unsa ang nahitabo kanato, kita naghunahuna.
Bisan og sipyat, kita gihapon naghunahuna, sipyat lang.
Sama sa imong gihawiran nga baso nga kon nahulog imo kanang gihunahuna
Nga nahulog, sipyat lang kay nalingat ka busa nahulog sa imong paghawid
og kini nabuak. O bisan nabuak na ang baso, imo gihapon kanang gihunahuna.
Kay ang tawo usa baya ka hunahuna. Dili ka tawo kon dili ka kabalo maghunahuna.
Dili ba ingon si Plato, man is a rational being.
Si Aristotle gani, misumpay nga Man is a social animal.

Kada adlaw ta dunay hunahuna. Pagmata sa buntag. Pagkatulog sa gabii.Naa gihapon kita sulod
sa damgo, naghunahuna.

kon ang paghunahuna mora na lang og ordinaryong gihimo sa tawo pwede usab nga ang pagsulat
ordinaryo na usab kaayong buhaton. Routine na lang. Mora lang og ikaw miginhawa og hangin.
O nalibang. O nanghatsing. O nangihi. O hagok.

kon imong gisulat ang tanan nimong hunahuna, seguro daghan ka na kaayog nasulat karon.
ang uban, however, bisag kasulaton,dili mosulat, dili tungod kay sila tapolan,kondili hadlok sila
nga masawayan ang ilang gisulat. Nga kini dili mao. Nga kini walay arte. Nga kini dunay mga regla o rules nga sundon. Nga kini mao ang standard nga gi-set ni Master Tarpolano og ni
Halangdong Tarpolana.

ayaw patuo nila. sila usab tawo pareho lang nimo. kon sila misunod sa nahauna kanila og sila gidayeg kay kahibalong mosunod sa mga talaan, og mga hisgotanan. og mga standards,
ayaw og awat kanila. paghimo og imong dalan. daghang bang sagbot? pwes gamita ang kahait sa imong dampas. kon kaya nimong pabothan og bomba, pabotha, para lang ka makahimo og imong
kaugalingong agianan. Kon barado, lugita. kon walay agianan sa imong atubangan, saka sa taas.
ambak. kon wala na jud lain kalotsan, pagbuho og imo, agi ka sa ilalom sa kalibotan.

ayaw og awat kanila kay sila nangawat ra usab sa mga nahauna.
sayon ra ang pagsulat kay imong ibasi kana sa imong mga gihunahuna.
mababaw man og malalom, ang imo, imo ra jud.

ikaw ang bag-ong manunulat.
Orig.

walay kiber. walang paki.
walay labot kanila kay wala usab silay labot kanimo.

who knows? mobilib sila nimo, og ikaw na usab ang ilang sundogon
sundon, awaton. apan,kabalo ko nga dili kana nimo trip.

nagsulat ka kay ganahan ka mosulat. walay pressure. walay nagsugo.
walay amo. walay ulipon. walay teacher. walay student.

Orig. Ikaw kana.
Pagkugi lang.

ipagawas ang tanan nimong gibati.
isulat ang tanan nga naa sa imong hunahuna.

og kadtong dili nimo masulat,ayaw lang pod.
secret,di ba?

o sulat na. share ta aning akong coffee nga barako.
init pa kaayo.