ang akong nipis nga tapis

ang akong tapis sa akong
pagkatawo nipis
ra kaayo

ania ako naglingkod
sa sidsid sa akong mga
damgo

tidyot lang ang akong
kahayag nga gitabonan
sa kangitngit
niining lawak sa akong
galamhan

nangita ako sa imong
kahayag
isip pabilo sa akong
kahayag

giduslak ako sa
punyal sa kamingaw

giuhaw ako sa
katam-is sa imong
paglantaw

dusliti ako, dalhi ako
sa imong kahayag

maghimo kita og
kalayo diri sa tunga-tunga
sa akong mga nag-uga
nga mga dahon
sa ilalom sa akong mga
kakahoyan

mingaw kaayo ang
awit sa akong mga
kalanggaman dinhi

ang mga gangis
wala na maningog

nagpaabot ako kanimo
og kon moabot ka

ihunghong kanako
ang imong kainit

maghimo kita og
kalayo sa akong
mga kagwangan

gusto ko nga masunog
ako sa akong kaulag
tapad kanimo

gusto ko nga ako
mahimong abo
ibabaw kanimo

hiposa ang akong
nipis kaayo nga tapis

handomanan kana
sa akong katam-is.