AKO NGA MOKAON OG KALAYo

ako nga mokaon og kalayo
nabuhi sa kalayo
molangoy sa kalayo
og motidlom sa kalayo

gusto ko nga modilaab
ang mga lukay doul nianang punoan
sa lubi nga naghitik sa iyang mga bunga
gusto ko nga ang imong kalayo maoy
magdagkot sa akong pagkatawo

ako ang langit sa mga lukay nga
gustong masunog
ako ang mga bunga sa ilang pagdilaab
og wala akoy gahom sa pagpalong niini

mokaon ako og daghang kalayo
ang akong mga singot mao ang mga aso
og ang akong kataposan mao ang
mga abo
diha sa imong mga paa
nga hamis og humot kaayo
pamuniton ako ugma
sa sayong buntag diha
sa imong tiilan nangandoy

gihapon nga sa imong mga
kumagko bisan na lamang
unta og matumban