aduna unta akoy ihatag kanimo

aduna unta akoy ihatag kanimo
ang akong kabuntagon mao ang nagputos niana
iyang gitunol sa akong kaudtohon

hapit na ang kahaponon
nagtagad intawon nianang putos nga bulawanon
ihatag ko unta kini kanimo apan ang duhaduha nahimong
upat-upat, nahimong walo-walo, og nasayop pa gayod
paglitok ang mga pulong
kay nadakin-as sa kilid sa dalan sa kalimot
ang iyang nahinumduman mao lamang ang kahumot
sa usa ka kampopot og ang mibalik kaniya
mao na lamang ang kahinam nga wala na diha

ang kawang, ang maaghop nga pangagho
sa akong kinabuhi
dapit sa nagkaduol nga kahaponon
gitaktak nako ang abog sa akong sapatos
gitangtang ang mga amor
seco diha sa akong maong nga karsones
og akong gihingot-an pati ang akong puti nga medyas
nga miambit sa pipila ka tapot kaayo nga mga amor
seco.

pescaw seco. nagchavacano ko. bahong bulad
nanimahong bulad ang imong mga palad.
aduna unta akoy ihatag kanimo apan ang akong
pitaka mibati og gamayng kaulaw
napilo, nanirado, mitago sa likod nga bulsa
sa akong karsones

wala pa nako kaayo masinati ang
singsing sa imong too
nga kamot
sa ikaupat nimo nga tudlo,
og ang imong bakos morag hugot
og lig-on pa nga migakos sa imong hawak.

ngitngit na, sayo ang kangitngit sa akong kahaponon
dili una ako mouli sa balay sa akong igsoon (este asawa)
adtoon ko ang nalimtan nga himaya didto sa
tago nga balay ni Florinda.

nagtagad siya kanako kay karong gabii
manikop kami og mga gagmayng
bitoon sa dakong hunasan sa langit
sibuton kini niya sa iyang dughan og
ako ang mananagat nga mosalom niini.

nahinumduman ko na, ang ihatag ko unta kanimo.