tumanon ko ang iyang gitudlo kanako
og kini akong ibalik pagsulti kanimo
aron lang pagsalbar sa atong mga
gitigom, gipundar kaniadto,
ang mga lig-ong haligi sa atong balay
ang mga mwebles nga nasunod nako
kang tatay
ang mga alahas ni nanay nga akong
gitaod sa imong dunggan
sa imong tudlo og sa imong liog
ania kita niining atong paglawig
dagko ang mga balod og kusog ang
hangin
wala sila mag-ingon nga ang mga
panghitabo nga sama niini
dili mahitabo kanato
sakto kita sa ilang mga pahimangno
daghan kaayo silag mga pasidaan kanato
og busa kon unsa ang imong gihambin
og kon unsa usab ang akong gilukdo
dili na nato kana panumbalingon
ang imong gihambin og ang akong
mga gilukdo gaan og gamay ra
kaayo kana kon itandi sa daghan
kaayong natigom sud sa atong dughan
atong pamation ang mga gipanulti
sa atong baba sa atong kasingkasing
gihigugma ko ikaw, gihigugma mo ako
kana lang ang gustong madungog sa kalibotan.
No comments:
Post a Comment